نادي منادي القلب الواجف * ولبى البشر الصوت الخاطف
جينا البلد الطاهر عمره * وسال الدمع السابل وزارف
ركعنا.. سجدنا.. طفنا.سعينا * جلسنا دعينا تلينا مصاحف
زرنا الهمزه وسبعة مساجد * وزرنا بقيع الجيل السالف
بقيت بالحب النبوي متيم * مليت بالشعر الصوفي صحائف
قلت أزورك أعانق نورك * ونبض القلب الشوق الجارف
نويت أسقيك إحساس بالنيل * وغنوة ريد بصوت الكاشف
سألت عليك مليون متغرب * سألت عليك أحزاب وطوائف
طلبت العقل الآلي السنتر * لعله يحدد نمرة هاتف
كان الرد السلبي مسطر * قال العقل البنضم آسف
خلاص الأمل الشايلو اتبعثر * ورفض الحظ القاسي يحالف
ولما العقل احتار واتحير * قلت أسافر ليك وأجازف
أركب عربه ظريفه خفيفه * أأجر هنتر وطبعاً عارف
لو تترحل خالي إقامة * تكون في حساب الشرطي مخالف
مهما تحاول تختا الكشه * ليك العسكر لازم يصادف
يقول لك وخّر وري هويتك * جنب عندك وخليك واقف
رجعنا بلدنا وما تلاقينا * وماتهنينا بالونسات الفيها طرائف
ليك وصية تتم بالنية * من القلب الكلو عواطف
تعال اتهنى وكمّل دينك * شقى في الغربة الزول العازف
ألف تحية لكل مهاجر * صان العشرة معاك في الطائف
حي جمال الطقس الساحر * وكل ثمار الشجر الوارف
وأقبل من سودانا تحية * إنت ضميرو وجرحو النازف
الإثنين 10 أغسطس - 19:11